Продолжен е рокот за замрзнување на цените на определни производи; утврден е текстот на Предлогот на Закон за АВМУ; заклучоци околу закупот на терминалот во Александрополис

Владата на Република Северна Македонија донесе Одлука за изменување на Одлуката за посебни услови за трговијата на одделни стоки.

Со Одлуката, се продолжува примената на веќе утврдени највисоки трговски маржи, од 30 април 2023 година, до 30 јуни 2023 година, за следниве стоки:

•        за леб бел (сечен на парчина или цел), шеќер бел и сончогледово масло за јадење (без ладно цедено масло), за сите трговски друштва и трговци поединци кои учествуваат во трговскиот ланец, во утврдената висина до 5% во трговијата на големо и до 5% во трговијата на мало и

•        за брашно од пченица – тип 400 и тип 500, макарони и шпагети од тврда пченица, македонски ориз бел, трајно кравјо млеко со масленост од 2,8%, 3,2% и 3,5%, јајца од кокошка, урда, кравјо бело сирење и мешано бело сирење, кашкавал, кисело млеко и павлака и јогурт, за сите трговски друштва и трговци поединци кои учествуваат во трговскиот ланец, во утврдената висина до 10% во трговијата на големо и до 10% во трговијата на мало.

Имајки во предвид дека со оваа Одлука се ограничува растот на цените преку утврдување на висината на трговската маржа, којашто треба да влијае на растот на цените на мало на основните прехранбени производи, а состојбата на пазарот укажува дека цените сѐ уште не се стабилизирани, според Образложението од предлагачот, Министерството за економија, има потреба од продолжување на примената на вака утврдените највиски трговски маржии во следните два месеца од оваа година, односно до 30 јуни 2023 година.

Владата го утврди текстот на Предлогот на Закон за изменување и дополнување на Законот за аудио и аудиовизуелни медиумски услуги.

Станува збор, според образложението од предлагачот, Министерството за информатичко општество и администрација, за усогласување на одредби во законот, со одредби од законодавството во Европскатa Унија.

Владата ја усвои и Информацијата за статус на проектот за ЗАКУП НА ЛНГ ТЕРМИНАЛ во Александрополис, Грција.

Задолжено е АД ЕСМ, меѓу заклучоците, да регистрира правни ентитети во Грција и Бугарија потребни за оперативни активности поврзани со набавка, дистрибуција и трговија со гас. Исто така, задолжено е АД ЕСМ да врши транспорт на природен гас преку интерконекторот со Република Бугарија, се додека интерконекторот со Грција се изгради.  

На почетокот на денешната седница, новоименуваниот Државен правобранител на Република Северна Македонија, Агрон Речи, пред премиерот и пред министрите во Владата, даде заклетва дека ќе работи совесно, чесно и одговорно, согласно Уставот и законите.