Девизниот прилив од туризмот со раст во првиот квартал од 2018
Девизниот прилив во првиот квартал на 2018та година, остварен по основ туризам бележи раст од 26,5%. Туристите во првите три месеци од оваа година потрошиле 64,71 милиони американски долари на патувања во Македонија, што е за 26,5% повеќе во споредба со истиот период претходната година.
Континуираното зголемување на девизниот прилив од туризам во последниве години се должи на мерките и активностите кои беа преземени изминативе неколку години од целиот турстички сектор во земјава. Имено, една од активностите кои ги релизира Агенцијата за промоција и поддршка на туризмот на Република Македонија во насока на промоција на Македонија во странски земји беше интензивирана и реализирана преку строго таргетирање на маркетинг кампања која се пласираше во таргет земјите. Со овој тип на маркетинг активности Агенцијата за туризам го рекламира туристичкиот потенцијал на земјава преку туристичките капацитети, локации, знаменитости, историја, култура, традиција и гастрономија.
Македонија се најде во бројни објави на светски познати магазини и интернет страни, додека интересот на информативни патувања во Македонија континуирано е во пораст. Реализацијата на турите за новинари и тур-оператори кои имаат за цел да го претстават туристичкиот потенцијал на државава важат за дополнение на промоцијата на државава. Приказната за промоцијата пласирана од страна на Агенцијата за туризам се заокружува со давање на различни видови на поддршка на приватниот сектор, како и поддршка на различни проекти кои имаат за цел засилување и збогатување на туристичките содржини.
Покрај растот на девизниот прилив по основ туризам, раст бележи и бројот на посети од домашни и странски туристи за 15,1% во првите пет месеци на 2018та година во споредба со истиот перод во 2017та година. Бројот на домашни туристи расте за 7,8%, додека кај странските гости е во пораст за 19% во истиот период. Овој тренд е проследен и со пораст во бројот на ноќевања остварени во Македонија (13,6%) во периодот од јануари-мај 2018та година, во споредба со истиот период лани.
Придонесот за целокупниот раст во туристичката индустрија, покрај наведените фактори, се должи и на зголемувањето на бројот на летови од и до скопскиот и охридскиот аеродром, но и модернизација на патната инфраструктура во земјава. Земајќи го предвид досегашниот тренд на пораст, очекувањата до крајот на 2018та година е овој тренд да регистрира благ пораст поради зголемувањето на број на туристи кои ќе патуваат низ Македонија со автобуси или сопствени возила.
