Јапонски тур-оператори во посета на Македонија
Агенцијата за промоција и поддршка на туризмот (АППТ) на Република Македонија во соработка со “Japan Association of Travel Agents (ЈАТA)”– Јапонска асцоцијација на туристички агенции и македонската амбасада во Токио, реализира информативно патување за туроператори од Јапонија.
Претставникот на “ЈАТА” Акихито Хосака, заменик генерален менаџер за Европа и нивните членки, туроператорите “ANA sales Co. Ltd”, “Nihombashi Yumeya Co. Ltd” и “Five Star Club Inc” се во посета на Македонија во текот на оваа недела. Гостите ќе се запознаат со туристичките содржини и производи кои ги има Република Македонија, а се атрактивни за јапонскиот туристички пазар.
Во текот на патувањето јапонските тур-оператори ќе остварат две бизнис средби со приватниот сектор од Македонија, во Скопје (на 15-ти мај) и во Охрид (на 17-ти мај), со цел остварување на директен контакт со македонските тур-оператори и можно отпочнување на соработка.
Во текот на денешниот ден јапонските тур-оператори ќе направат разглед на Скопје и околината, со посебен акцент на придонесот за град Скопје на архитектонските идеи на јапонскиот архитект Кензо Танге. Следниве неколку дена гостите ќе ги вкусат македонските специјалитети од традиционалната кујна, ќе се доближат до локалното население и ќе посетат дел од македонските цркви и манастири.
Посетата е во линија со идеата на Агенцијата за промоција и поддршка на туризмот преку која превзема иницијативи за проширување на македонскиот туристички производ, како во регионот така и на трети пазари. Оттука е и поддршката за запознавање на јапонските туроператори со туристичките дестинации на Македонија.
Голема благодарност директорот Јаневски упатува до амбасадорот на Република Македонија во Токио, Андријана Цветковиќ за залагањето и одржаните презентации и промотивни настани за туризам во организација на амбасадата.
