ЈОУДГ „Јасна Ристеска“ го одбележа својот патронен празник

08/11/2024

Со свечена приредба која се одржа вчера во спортската сала „Билјанини извори“, ЈОУДГ „Јасна Ристеска“ го одбележаа својот патронен празник.

Пред бројните родители и гости во името на Општина Охрид се обрати Ана Крстеска, заменик градоначалник.

– Навистина ми претставува посебно задоволство во ова убаво празнично попладне, кога ја славиме слободата на нашиот Охрид, да бидам дел од оваа неповторлива атмосфера и заедно со сите вас да уживам во овој прекрасен детски свет.

Детските насмевски се како сончеви зраци кои ни ги затоплуваат срцата, а детската радост ни ја исполнува душата со неописливи чувства. Децата се она што ги прави овие 80 години на Охрид историски значајни и вечни, тие се иднината на нашиот град, нашето највредно богатство и му даваат смисла на животот.

Децата се нашите најголеми учители, затоа што со својата невиност, ни покажуваат што значи вистинската љубов – онаа која расте кај секој од нас и се множи кога ја споделуваме со другите.

Со длабока почит, во мое лично име и во името на Општина Охрид би сакала да изразам голема благодарноста до целокупниот кадар на градинката „Јасна Ристеска“. Вашата несебична работа, посветеност и љубов, кои ги вложувате во секое дете, ја прави оваа установа вистинско царство на игри, воспитание и едукација.

Вашиот труд не може да биде измерен, но неговиот резултат се гледа во секое наше дете. Токму затоа, Општина Охрид постојано вложува во подобрување на условите за згрижување и образование, а така ќе биде и во иднина.

Драги дечиња, ви посакувам да имате безгрижно детство исполнето со другарување, а секој ден да ви биде поубав од претходниот. На вас, ценети родители ви поскувам да се гордеете со своите најмили, а на вас почитувани воспитувачи ви посакувам истрајност и нова креативна енергија, за вакви убави случувања.

Нека е честит патрониот празник на градинката, нека честит и вековит 7-ми Ноември, нека е вечен слободен Охрид, истакна Крстеска во своето обраќање.

Во рамки на свечената програма беа изведени бројни музички и танцувачки точки подготвени од најмладите, под менторство на воспитувачите од градинката.