Кривична пријава за злоупотреба во превоз на ученици во Старо Нагоричане

СВР Куманово до надлежното ОЈО поднесе кривична пријава против десет лица од Куманово – М.Ј.(60), М.С.(59), Г.Д.(41), Ж.М.(50), В.С.(54), С.С.(47), Д.С.(39), М.Д.(36), Л.Л.(62), Г.Д.(52), потоа против три лица од Скопје и едно лице од село Режановце кумановско – Ј.П. (52), Ѓ.В. (52), М.К. (45) и И.Т. (43), како и против четири правни лица (фирми), две од Скопје и две од Куманово а заради постоење основано сомнение дека сториле повеќе кривични дела. Имено, пријавените се сомничат дека во периодот од 2011 до 2017 година ги сториле кривичните дела: “злосторничко здружување“, “злоупотреба на службената положба и овластување“, “употреба на исправа со невистинита содржина“, “злоупотреба на постапката за јавен повик, доделување на договор за јавна набавка или јавно-приватно партнерство“, “фалсификување исправа“, и “помагање“. Притоа, тие со ваквите дејствија го оштетител буџетот на државата за износ од 39.815.609 денари или за нешто над 600.000 евра.

Според документираните сознанија од истрагата во периодот од 2011 година до декември 2017 година, пријавените со намера да се оствари противправна имотна корист на штета на буџетските сретства на Р.С. Македонија, обезбедени преку Министерството за образование и наука, а како блок дотации доделени за превоз на ученици за три основни училишта во општината Старо Нагоричане, организирале група од вработени во општината, директори на основните училишта и превозник од Куманово при што ја злоупотребувале постапката за јавен повик, доделување на договор за јавна набавка или јавно – приватно партнерство, изготвиле фалсификивани договори и на тој начин овозможиле правните лица да ги исполнат условите предвидени во тендерската документација. По ова, при користење на возилата за превоз на ученици за други намени, ги игнорирале претходно склучените договори за превоз, одобрувале и потпишувале фактури за извршени превозни услуги поединечно за секој месец со непрецизирани податоци без наведени релации, без број на ученици со многу повисоки фактурирани цени од договорените. Со ваквите дејствија и со признавањето на фактурите со невистинита содржина, пријавените го оштетиле буџетот на РСМ за износ од 39.815.609 денари.