Лекот Спинраза од вчера е достапен за пациентите со спинална мускулна атрофија

Лекот Спинраза од вчера е достапен за пациентите со спинална мускулна атрофија. Министерот за здравство доц. д-р Венко Филипче, утрово на прес-конференција информираше дека во текот на вчерашниот ден за првпат во нашата земја е даден овој лек.

„Во текот на вчерашниот ден за првпат во нашата земја беше даден лекот Спинраза. Станува збор за најнов лек кој се користи за третман на децата и возрасните пациенти коишто боледуваат од спинална мускулна атрофија. Тоа е најсовремена терапија што се дава во најразвиените земји во светот. Останатите 6 деца со соодветен распоред ќе ја добијат терапијата со Спинраза“, потенцираше министерот Филипче.

Во Република Северна Македонија се регистрирани 7 пациенти во детска возраст (до 18 години), и тоа СМА тип 2 и 3.

Со воведувањето на новиот лек, како прва генска терапија во третманот на пациентите со спинална мускулна атрофија се добива можност за интервенирање и промена на текот на болеста со одржување и подобрување на моторната функција, а со тоа подобар квалитет на живот и продолжување на животниот век.

Значително е зголемен буџетот на Програмата за ретки болести и обезбеден е лек за овие лица. Во 2016 година, буџетот изнесувал 203 милиони, додека пак за оваа година изнесува 485 милиони денари.

За две години, воведени се пет нови лекови: за болеста фамилијарна амилоидна полиневропатија, лек за апластична анемија, лек за спинална мускулна атрофија, ампуларна и таблетарна терапија за пациентите со Гоше и лек за терапија за пациентите со идиопатска белодробна фиброза.