Летно промашување на организаторите: Античкиот театар празен за магичната моќ на музиката на Џијан Емин

Синоќа беше убаво да си на Антички театар во Охрид.

За жал, малкумина ја почувствуваа и ја доживеаа пријатната, ладникава магична ноќ, со, исто така, магичната моќ на музиката на Џијан Емин.

Поранешниот член на Архангел ја сподели својата музика, заедно со Македонската филхармонија и Здружението на џез музичари.

“Нурни длабоко”, требаше да биде илинденски подарок за охриѓани и нивните гости.

 Меѓутоа, охридскиот Антички театар беше не полу-празен, туку празен!

Не дека не би имало интерес за едно вакво доживување.

Охрид не знаеше што синоќа му се нуди на неговата најатрактивна концертна сцена.

 Слабата организација и никаквата промоција, уште еднаш го направија своето.

Не дека немаше доволно публика. Охрид, за продолжениот илинденски викенд, стенка под тежината на десетици и десетици илјади гости.

Познавачите велат дека никогаш порано македонскиот туристички центар не доживеал ваква навала.

Да се најде паркинг простор за возило е премија.

На најатрактивните плажи нема место, капачите се наредени еден до друг.

Напладне кон плажите – колони возила, навечер во обратен правец.

Охрид е полн како око!

В.М.