Mеѓуинституционална соработка и преземање на активности за поддршка и промоција на туризмот

Директорот на Агенцијата за промоција и поддршка на туризмот (АППТ) на Република Македонија, г-дин Љупчо Јаневски, оствари работна посета на Југоисточниот регион кој изобилува со природни убавини, а се предуслов за креирање на сеопфатна туристичка понуда. За време на посетата на Југоисточниот региони, со градоначалниците на општина Гевгелија, Сашо Поцков и општина Дојран, Анго Ангов, се дискутираше за преземање на заеднички активности за уште поуспешна туристичка сезона во 2018 година.

“Дојран како туристичка дестинација заслужува поголема поддршка во сегментот на зголемување на туристичката сезона, но неопходна е и поголема дисциплина во плаќањето на туристичка такса од страна на чинителите од овој доходовен сектор, којшто е значаен за локалната економија. АППТ повторно ќе ја разгледа можноста за отпочнување на проектот Е-75 кој има за цел задржување на транзитните патници кои ја поминуваат оваа меѓународна трансферзала. Дојран оваа сезона е во очекување на звучни имиња од музичката индустрија кои ќе настапат на Д-фестивалот и ќе овозможат незаборавно летно фестивалско доживување, а АППТ без заддршка дава поддршка на овој фестивал, кој продолжува како концертна традиција и воедно промоција на Дојран како традиционална дестинација”- истакна директорот на АППТ, Љупчо Јаневски.

Во текот на дискусијата со градоначалникот Сашо Поцков се отвори и можност за формирање на одделение за развој на туризмот во општина Гевгелија, со акцент на развој на здравствениот туризам проследен со извонредните можности кои ги нуди Кожув во текот на целата година. Во контекст на поголема промоција на регионот, двете општини изразија волја за учество на регионалните саеми за туризам.

Во изминатиот период Југоисточниот регионот успеа да го привлече вниманието на туристите преку презентација на чиста и здрава околина во која има езера, планини, водопади, термални води, етно-села, манастири, но и локални манифестации, традиционална храна и гостопримливи домаќини. Ова е дополнително потврдено со статистичките податоци кои покажуваат континуитет во растот на домашните и странските туристи, но и во бројот на остварени ноќевања во Југоисточниот регион.

За време на посетата на Југоисточниот регион, Директорот Љупчо Јаневски присуствуваше и на 10-та јубилејна Туристичко-гастрономска изложба на алтернативни форми за развој на туризмот, организирана во Гевгелија од страна на Факултетот за туризам и бизнис логистика, Универзитет “Гоце Делчев” од Штип. Автентичните вкусови и мириси преточени во традиционални кулинарски специјалитети ја карактеризираат Македонија како една од “највкусните” дестинации. Искуството на доживување и вкусување на локални производи од недопрените предели на Македонија и чисти планински мириси на мед, диви печурки и зачини е проследено во најновата репортажа на “Lonely Planet”, за храната како фундаментален елемент на секое патувачко искуство. Нови форми и нови кадри во туризмот се потребни за да се следи чекорот со светските трендови, но неопходно е и освежување на дестинацијата со нови содржини, кои нема да го исклучат традиционалниот момент.