Над 100 полициски службеници и хеликоптер продолжуваат со активна потрага по Петар Џобоски

Министерството за внатрешни работи продолжува со интензивната потрага по детето Петар Џобоски, за кое неговиот родител пријави во петокот (25.02) вечерта дека се оддалечило од домот во с.Врбско, општина Прилеп.

Во потрагата се ангажирани 102 полициски службеници, хеликоптер, службени кучиња, како и дрон, а во потрагата се вклучени и членови на Територијалната противпожарна единица Прилеп, членови на спасителната служба „Златоврв“, ловното друштво „Мукос“-Прилеп, жители на околните села, како и граѓани доброволци од неколку градови.

Интензивната потрага продолжува се до пронаоѓање на детето. Поради големиот интерес, граѓаните кои сакаат да се вклучат во потрагата, а со цел подобра координација, може да се јават на телефонскиот број на дежурната служба во с.Витолиште 071 268-594.

МВР упатува апел до сите граѓани доколку имаат било каква информација која би помогнала за пронаоѓање на детето, да ја споделат веднаш со полицијата и да помогнат во потрагата. 

ВебОхрид / 28.02.2022 / МВР