Петкоска: Поради профитот СДСМ и градоначалникот Стојаноски го загрозија угледот на Охрид

Во просториите на Општинскиот комитет на ВМРО-ДПМНЕ Охрид денес се одржа прес-конференција на која говореше советничката Лидија Петкоска.

„Очекувавме Охрид да се развива во модерна туристичка дестинација, но поради профитот СДСМ и градоначалникот Стојаноски го загрозија угледот на Охрид. Со нивната безидејност, незнаење и немање план добивме хаос во поставувањето урбана опрема и останати реквизити за забава.

Ѕидините на Самоиловата тврдина се затскриени со тезги. Каде е плоштадот на уметноста кај Долна порта и културното катче? Владее хаос кај Амамот и Градскиот плоштад. По Кејот бокс апарати, надуени реквизити, мал автодром, вовчиња насекаде, само не на точно одредени локации. Чинарот како знаменитост воопшто не е достапен за туристите. Добивме Лесковачки роштиљ туризам на изградената пешачка и велосипедска патека. Со која ли метода, со кој ли елаборат за животна средина и која ли работна група одлучила дека е оправдано поставување на угостителски објект на самата велосипедска патека?

Почитуван градоначалник Стојаноски,

Го уништувате Охрид, а секојдневно упорно нè убедувате дека ветениот – турузам 365 дена во годината – е невозможна мисија за безидејниот и несовесен СДСМ.

Каков туристички прoизвод им нудите на туристите и каде туристите можат да пробаат локални производи? Кои атрактивности ги нудиме во нашата приказна?

Господа од СДСМ,

Време е да се свестите дека сите живееме од ист производ, а тоа е туризмот. Не ја добивте поддршката од охриѓани, за да им го уништувате она што им е свето. Затоа, надминете се себе си и грижата за туризмот препуштете им ја на оние кои можат, сакаат и знаат да му се посветат, на оние кои умеат да го осмислуваат и унапредуваат.“ – истакна Петкоска.