Полетиштето на Мечкин Камен во Крушево подготвено за сезоната на летање

Храбрите заљубеници во височините ќе можат безбедно да полетуваат, во подобрени услови и на нова професионална вештачка трева. Теренот во Крушево е подготвен за одржување на многу национални, меѓународни, европски и светски првенства во параглајдинг и змејарство.

Сите љубители на ова парче небо преку своите возбудливи искуства се најдобра промоција на Македонија, како дестинација за параглајдинг.

Градоначалникот на Крушево, Томе Христоски и Воздухопловната федерација на Македонија во јули и август најавија 7 купови во параглајдеризам и змејарство, додека во 2019 година се очекува одржување на Светско првенство во овој адреналински и екстремен спорт.

Вештачката трева општина Крушево ја набави во соработка со Агенцијата за промоција и поддршка на туризмот и истата чини 1 200 000 денари. Додека, иницијативата за реализација на овој проект е поттикната од Воздухопловната федерација на Македонија. Нескриено е задоволството од сите инволвирани страни и со нетрпение ги очекуваме светските параглајдеристи на наш терен.

„Во насока на исполнување на стандарди за одржување на меѓународни натпревари и со цел промоција на Република Македонија како дестинација за параглајдинг, Агенцијата за туризам континуирано работи за валоризација и унапредување на туристичките продукти од овој регион. Параглајдерството е атрактивен натпреварувачки и рекреативен спорт и воздухопловна гранка, која го привлекува вниманието на туристите. Во контекст на ова, бројот на туристи и остварени ноќевања во Крушево е во постојан пораст, а за оваа година е најавено двојно зголемување на љубителите на активен туризам. Веќе неколку пати напоменав дека следејќи ги туристичките трендови, Агенцијата за туризам го промовира Крушево како дестинација за четири сезони, промовирајќи квалитетна туристичка понуда. Зголемувањето на понудата во делот на алтернативните форми на туризам, која е многу подоходовна за лoкалната економија, значи искористување на сите уникатни, природни ресурси кои Македонија ги има во изобилие, но на еден одржлив и безбеден начин” – изјави директорот Љупчо Јаневски.

Параглајдерството е еден од сè попопуларните, атрактивни, екстремни спортови во светот, а Крушево веќе станува омилена дестинација. Метеоролошките услови, термичките струења на воздухот во текот на целата година, а особено во јули и август се идеални за развивање на овај спорт во околината на Крушево. Просторот е многу питом, пошумен, широк и безбеден. Од особена важност е фактот што целиот планинскиот масив е свртен кон рамнината Пелагонија што е најважен фактор за безбедноста на летањето. Љубителите на параглајдерство и едриличарство го посетуваат Крушево во текот на целата година.