Премиерката Тереза Меј го честиташе постигнатиот договор со Република Грција и ратификацијата во Собранието на Република Македонија

Премиерката на Обединетото Кралство на Велика Британија и Северна Ирска, Тереза Меј, денеска, со писмена честитка адресирана до Претседателот на Владата на Република Македонија, Зоран Заев, го честиташе постигнатиот договор помеѓу Република Македонија и  Република Грција, како и ратификацијата на договорот во Собранието на Република Македонија.

„Вакво значајно постигнување не би било возможно без политичката храброст, визија и лидерство, какви што двајцата покажавте. Како што претходно разговаравме во Скопје, решавањето на ова прашање ќе донесе енормни придобивки за двете држави, како и за поширокиот регион“, стои во писмото од премиерката Тереза Меј.

Таа, во своето писмо додава и дека конечно после 25 годишниот спор, желбите на огромно мнозинство граѓани, кои сакаат да ја видат својата земја како членка на НАТО и ЕУ, ќе ги отвори вратите за овие аспирации.

„Како долгогодишен пријател, Обединетото Кралство ќе продолжи да ја поддржува Македонија во патот на пристапувањето кон членството во Евро-атлантскиот сојуз, како и во мирот и просперитетот, што овие аспирации како и останатите реформи ќе го донесат за Вашата земја, и за регионот како целина“, се истакнува во писмото на премиерката Меј.

Заблагодарувајќи се за гостопримството за време на нејзината посета во Скопје, премиерката на Обединетото Кралство во писмото порачува дека се радува на претстојната средба со премиерот Заев, и со останатите премиери од регионот, на Самитот за Западен Балкан, кој ќе се одржи следниот месец во Лондон.