Премиерот Заев на средба со светската рекордерка во маратон, Пола Редклиф

Во пресрет на одржувањето на годинешниот скопски Визер маратон, денес Претседателот на Владата на Република Македонија, Зоран Заев, придружуван од директорот на Агенцијата за млади и спорт, советниците за спорт и млади, Ѓорѓи Тасев и Даниел Димевски, се сретна со светската рекордерка во маратон, и промоторка на маратонот, Пола Редклиф, и претставници од организацијата на маратонот.

Гостите го запознаа премиерот со почетоците и развојот на овој скопски маратон низ годините, како и со светските резултати и постигнувања на г-ѓа Редклиф во маратонските трки.

Тие исто така изразија огромна благодарност за поддршката која ја добиваат од Агенцијата за млади и спорт во целокупната организација на оваа спортска манифестација.

Премиерот Заев, во оваа прилика истакна дека мисија на оваа Влада е да го промовира спортот во Република Македонија, со посебно внимание на младите спортски таленти, затоа што, како што рече тој „спортот е најдобриот амбасадор посебно за малите држави. Клучно е да ги мотивираме граѓаните, а посебно младите да спортуваат.”

Исто така, премиерот Заев ги запозна гостите со плановите за развој на спортовите во Македонија преку законски измени кои, меѓу другите мерки, опфаќаат и механизми за даночни олеснувања за компаниите кои ќе се вложат во развојот на спортот во Република Македонија.