Претставена македонската олимписка делегација
Македонија на претстојните Летни олимписки игри (ЛОИ) што ќе се одржат од 26. јули до 11. август во Париз ќе ја претставуваат шестмина спортисти.
Знаменосци на свеченото отворање ќе бидат Дарио Ивановски и Мила Рељиќ.
На денешната прес-конференција во Македонскиот олимписки комитет (МОК), беше презентирана комплетната македонска делегација која ќе ја сочинуваат Дарио Ивановски (атлетика), Владимир Егоров (Борење/ до 57 кг, слободен стил), Никола Ѓуретановиќ (пливање/ 400 метри слободно), Анастасија Мојсовска (стрелаштво/10 метри воздушна пушка), Еди Шерифовски (џудо) и Мила Рељиќ (таеквондо).
Покрај спортистите, Македонија на ЛОИ ќе ја претставуваат и судиите Ѓорѓи Начевски и Славе Николов (ракомет), Иван Михајловски (триатлон) и Анета Павловска (тенис).
Олимписката делегација беше и кај Претседателката на Македонија, г-ѓата Гордана Силјановска Давкова која и го даде знамето на Милијана Релиќ наменето за отворањето на Олимписките игри во Париз.
-Со чест и задоволство го врачив македонското знаме коешто нашите олимпијци ќе го развиорат на отворањето на Летните олимписките игри во Париз 2024.
Со гордост и достоинство бранете ги боите на Македонија.
Јас и сите македонски граѓани сме со вас и навиваме од срце, истакна Силјановска-Давкова.
WebOhrid / 22.07.2024 / МОК
