СДСМ: Официјалните податоци ги демантираат празните обвинувања на Мицкоски, економијата се движи во добар правец!
СДСМ со соопштение до јавноста, во кое стои:
„Христијан Мицкоски човекот што го советуваше Никола Груевски во носењето и спроведувањето на погубните економски политики нема никаков кредибилитет да зборува за економијата.
Мицкоски и ВМРО-ДПМНЕ не можат да се помират со успешните економски политики на Владата предводена од СДСМ и затоа напразно обвинуваат.
Реалните факти ги демантираат лажните обвинувања на Мицкоски и ВМРО-ДПМНЕ. Според официјалните податоци на Државниот завод за статистика, идустриското производство во период јануари – мај 2018 е за 3,5 отсто поголемо во однос на периодот јануари – мај 2017. За потсетување, тоа е периодот кога партијата на Мицксоки со сите сили одбиваше да овозможи мирен трансфер на власта.
Евидентен е растот на минималната и просечната плата, растот на извозот и намалување на невработеноста. Само во првиот квартал од годинава во Македонија се влезени рекордни 235 милиони евра странски инвестиции, без при тоа да биде потрошен денар за скапи роуд шоуа и кампањи. Сето ова се реални податоци што ги демантираат празните обвинувања на Мицкоски.
Лицемерно и несериозно е Мицкоски да глуми загриженост за младите, кога токму во периодот на владеење на ВМРО-ДПМНЕ од државата заминаа над 600 илјади луѓе, а најголем дел од нив беа млади, образувани и работоспособни луѓе на кои криминалното владеење на ВМРО-ДПМНЕ им ја затвори секоја можност за успех.
Мицкоски и ВМРО-ДПМНЕ и натаму нека ја следат работата на Владата предводена од СДСМ за да научат како се работи одговорно, домаќински и во интерес на граѓаните.“- стои во соопштението.
