Се одржаа „Денови на македонската поезија во Шведска“

Во мошне убава атмосфера вчера во Градската библиотека во Гетеборг се одржа традиционалната манифестација „Ден на македонската поезија во Шведска“. Учествуваа дваесетина учесници од разни литературни здруженија и од Писателскиот центар на западна Шведска, како и ученици од македонско потекло со музички и рецитаторски изведби од познати македонски писатели, а присутните ги поздрави македонската амбасадорка во Шведска, Мира Крајачиќ.

Гостин од Македонија беше познатиот македонски поет Борче Панов, кој е и уметнички координатор на Меѓународната книжевна манифестација „Караманови средби“ во Радовиш. Манифестацијата наиде на големо интересирање, а по поетското читање се одржа и годишно собрание на поетското друштво „Дениција“ со седиште во Гетеборг, при што за претседател на друштвото повторно е избран поетот Ивица Челиковиќ. Притоа беше констатирано дека постојат реални претпоставки оваа поетска манифестација, која е единствена од таков вид што се одржува секоја година во редовите на македонската дијаспора во Европа, да се зголемува по обем и содржина, а за што би било неопходно во наредниот период да се обезбедат и поголеми буџетски средства, како од страна на шведски институции, така и од македонски извори. Во таа насока ќе бидат направени напори македонскиот поетски фестивал во Шведска, кој наскоро ќе наближи до одбележување на својот 35-годишен јубилеј, да добие редовна програмска поддршка од Министерството за култура на РСМ.

WebOhrid / 05.10.2022 / Агенција за иселеништво