Спроведени акциски контроли за подигнување на степенот на безбедност во сообраќајот

Во текот на викендот, полициската станица за безбедност во патниот сообраќај Охрид, спроведе локални акциски системски контроли на моторни и други возилата, на возачите, товарот и патниците, но и во однос на непрописно запирање и паркирање и неовластено вградување и користење на уреди за давање на посебни светлосни и звучни знаци во возилата, управување на возило со брзина поголема од пропишаната, во однос на прекршоци кои ги чинат возачите на велосипеди, велосипеди со помошен мотор, мопеди и моторцикли и по други основи.

Притоа, контролирани се триесет моторни возила и евидентирани се вкупно осум возачи кои ја пречекориле брзината на движење во, и надвор од населено место со брзина поголема од 10 до 50 километри на час. Покрај тоа, регистрирани се четири непрописно паркирани патнички моторни возила и осум прекршоци направени од возачи на велосипеди со помошен мотор и мопеди. Кај четири лица регистрирано е некористење на заштитен шлем-кацига за време на управување со мопед, еден случај на управување без возачка дозвола, еден случај на управување мопед со изминат рок на важност на регистрација и еден на нерегистриран мопед.

По овие основи, преземени се соодветни мерки и издадени се еден мандатен и седум прекршочни платни налози, две лица се писмено предупредени, а четири се повикани на сообраќајна поука.

Мерките беа преземени во согласност со Законот за безбедност во сообраќајот на патиштата со цел подигнување на степенот на безбедност во сообраќајот и почитување на сообраќајните правила и прописи.