Тарик Филиповиќ на 20то јубилејно издание на Фестивалот на монодрама во Битола

Овогодинешното јубилејно издание на Интернационалниот фестивал на монодрама Битола 2018, во организација на Центарот за култура Битола, започнува на 11 мај и ќе трае до 15 мај. Веќе се познати учесниците во натпреварувачкиот дел, како и стручното жири, а подготовките за ова издание се веќе при крај.

Интернационалниот фестивал на монодрама Битола 2018, ги отвора вратите за љубителите на еден од најтешките жанрови во театарската уметност – монодрамата, со претстави кои годинава доаѓаат од различни делови на светот, прикажувајќи и различни театарски изрази. Годинешни учесници на фестивалот се:

Шовги Гусеинов од Азербејџан, со претставата „Контрабас”
Тјаша Ферме од САД, со претставата „Дивото дете во градот”
Матеуш Новак од Полска, со претставата „Однапред и одназад”
Миxаил Милчев од Бугарија со претставата „Мадам Мишима”
Среќко Марчета од Босна со претставата „Големо е моето срце”
Александер Аладишев од Русија со претставата „Сништата на Хамлет”
Тарик Филиповиќ од Хрватска со претставата „Ќиро Блажевиќ”

Наградата Гран-при на Интернационалниот фестивал на монодрама Битола 2018 ќе ја додели тричленото интернационално жири под претседателство на режисерот и актер Коле Ангеловски, Нина Мазур – театролог и театарски критичар од Германија и актерката Весна Петрушевска.

Селектор на фестивалот е актерот Петар Мирчевски.

Министерството за култура и годинава е главен поддржувач на Интернационалниот фестивал на монодрама Битола 2018 година, кој го организира Центарот за култура по 20-ти пат, со помош на Општина Битола.