Утре во Вевчани ќе биде промовирана најновата поетска збирка на Димче Шипинкаровски
Утре навечер (19:30) во Вевчани, во црковниот храм Свети Никола, ќе биде промовирана најновата поетска збирка на Димче Шипинкароски, „Татковиот аманет”, издадена од Здружението за литература, култура и наука “Бран” од Струга.
Димче Шипинкаровски е овогодишен добитник на наградата од престижната поетска манифестација “Антево Слово”, која се доделува во чест на истакнатиот македонски поет Анте Поповски.
Уредник на изданието е Борче Панов, додека професор д-р Христо Петрески, претседател на Друштвото на писателите на Македонија, во посебна рецензија, прави осврт на творештвото на Шипинкаровски.
Промотори на збирката ќе бидат професор д-р Христо Петрески, кој ја напиша и рецензијата за книгата, како и Мишо Китаноски и Веле Митаноски.
Покрај насловната песна, посветена на неговиот покоен татко, писателот, поет и есеист Петко Шипинкаровски, Димче Шипинкаровски, остава белег во македонската поетска ризница, уште и со песните “Испустено огниште” и “Голем ангелу од Небрегово”, посветени на Блаже Коневски, потоа “Нож в грб”, посветена на Коле Чашуле, како и со бројните лирски записи, како во песната “Вака зјдвит сонцето во Струга”.
Рецензентот Петрески, го претставува поетот Шипинкароски како еден од новите современи македонски автори, во рецензијата насловена „Чинот и радоста на создавањето“.
WebOhrid / 28.07.2022 / Веле Митаноски
