ВМРО-ДПМНЕ: Проблемите на стружани не само што не стивнуваат, туку се’ повеќе се продлабочуваат

ОК на ВМРО ДПМНЕ Струга испрати соопштение до медиумите, во кое стои:

„За жал, проблемите на стружани не само што не стивнуваат, туку се’ повеќе се продлабочуваат. Освен што граѓаните на Струга и туристите кои што го посетуваат овој туристички центар за време на летната сезона, се дават во ѓубре и смрдеа, тие се соочени со уште пострашен проблем, а тоа е немањето вода.

Во текот на летото, и оваа година, како и неколку претходни, луѓето се оставени на милост и немилост од страна на МЈП ,,Проаква”, и покрај секојдневните нивни поплаки, молби и жалби.

Почитуван градоначалнику и почитуван директоре на МЈП ,,Проаква”,

Зарем Вам не Ви пречи тоа што цел град ги преживува овие пеколни температури без вода?

Зарем Вие не сте дел од овој град и дали вака треба да изгледа нашата преубава Струга во 21 век.

Нели ветувавте подобар живот?

Ова ли е подобар живот и вака ли ќе одиме кон Европа, без вода за основни егзистенцијални потреби?

Би сакале да Ве потсетиме дека Вие сте тука за да ги решавате проблемите на граѓаните, а не да ги создавате!

Оваа состојба е веќе алармантна и неиздржлива и токму затоа поголема група граѓани од повеќе реони на општина Струга ви најавуваат тужби.

Упатуваме апел до надлежното претпријатие МЈП ,,Проаква”, како и до градоначалникот на општина Струга, Рамиз Мерко, што поскоро и сериозно да се зафатат со работа и да го решат овој горчлив проблем на граѓаните затоа што тие секојдневно, со натчовечки сили се борат со години наназад со оваа тешка состојба.

Доколку не сте способни и не можете да го решите овој алармантен проблем, напуштете ги вашите удобни фотелји и отстапете ги функциите на некој што може да се справи со овие проблеми.“– стои во соопштението.