Во понеделник започнува деветтото „На зајдисонце“ во Трпејца

На 20 јули, од 20 и 30 часот, токму на зајдисонце во организација на Здружението „За Трпејца со љубов“ ќе започне новото издание на Културно – забавното лето во Трпејца.

Честа да ја отвори манифестацијата со изложба на свои ракотворби – филигран со срма ќе и’ припадне на Дијана Велјаноска од Охрид, која по мајка е од Трпејца.

На отворањето, во музичкиот дел со свои хитови ќе настапи познатата македонска естрадна ѕвезда Верица Пандиловска.

Следниот ден во вечерниот термин ќе биде промовирана новата книга на Академик Миле Миќуновиќ под наслов „Метафора“ во издание на НУ Библиотека „Григор Прличев“ од Охрид а ќе настапи и музичкото дуо BLACK MOON – Мила и Билјана.

Во среда на 22 јули на истата отворена сцена Кај Бунарот премиерно ќе биде прикажан документарниот филм „Трпејца на дланка“ работен по сценарио на Милчо Јованоски а во режија на Томе и Кристијан Љушеви. Таа вечер публиката ќе дружи и со гитарата на младиот охридски музичар Мартин Милески, автор на музиката во веќе споменатиот документарец.

Вечерите потоа на веќе култното „На зајдисонце“ ќе следат средби со Живко Поповски – Цветин и неговите „Цвеќиња на мирот“, евергрин вечерта со Емилја Маринова и Јане Тодороски, презентацијата на колажот записи од познатиот писател и публицист Данило Коцевски посветени на Трпејца а интерпретирани и прераскажани од актерката Марија Кондовска и неговата ќерка, новинарката Јана Коцевска.

Во Трпејца почитувајќи ги сите протоколи кои ги налага заштитата од Ковид – 19 свои мини концерти ќе имаат и хит групата меѓу младите охриѓани а и меѓу повозрасните „Броз“ со фронтменот Владимир Сарафилоски и ансамблот „Билјана“.

И годинава актерката Марија Новак ќе ја одржи Театарската работилница со деца летувалци и деца од Трпејца и на сцена заедно ќе прикажат што научиле, а ќе биде отворена и изложба на дела од Втората интернационална колонија „Трпејца 2019“.

Кога сме кај традициите уште два настани се посебно привлечни: Работилницата „Цртаме на зајдисонце“ со уметникот Слободан Пупиноски и Вечерната променада „Со кајче по езерото“. Млади музичари ќе свират на виолина, гитара, флејта и хармоника а гостите од брегот, куќите и рестораните ќе можат да уживаат во нивната музичка изведба.

Во текот на деветте дена во Трпејца ќе се одржат и традиционалната Кајакарска регата „Номче Митрески“, излетот до Чоколско во соработка со НП „Галичица“ како и натпреварот „Фаќаме риба на јадица“.

Пандемијата со Ковид – 19 го правеше неизвесно одржувањето на деветото издание на Културно – забавното лето „На зајдисонце “ во Трпејца кое веќе стана препознатливо по своите содржини.

И годинава покровител на манифестацијата е Општина Охрид а покрај Министерството за култура ова издание финансиски за прв пат ќе биде помогнато и од Делегацијата на Европската Унија во Скопје, како и од други спонзори.

ПРОГРАМА НА ДЕВЕТТАТА КУЛТУРНО – ЗАБАВНАТА МАНИФЕСТАЦИЈА

                            „НА ЗАЈДИСОНЦЕ“ ВО ТРПЕЈЦА 2020

20 ЈУЛИ –ПОНЕДЕЛНИК :

20.30 СВЕЧЕНО ОТВОРАЊЕ

20.45 ИЗЛОЖБА НА ДИЈАНА ВЕЛЈАНОСКА ОД ОХРИД – ФИЛИГРАН СО СРМА

21.00 КОНЦЕРТ НА ВЕРИЦА ПАНДИЛОВСКА

21 ЈУЛИ – ВТОРНИК :

10.00 ТЕАТАРСКА РАБОТИЛНИЦА СО МАРИЈА НОВАК ( ОД ВТОРНИК ДО ПЕТОК )

17.30 ЦРТАМЕ НА ЗАЈДИСОНЦЕ – РАБОТИЛНИЦА ЗА ДЕЦА СО СЛОБОДАН ПУПИНОСКИ ( ВТОРНИК И СРЕДА )

20.30 ВЕЧЕР СО АКАДЕМИК МИЛЕ МИЌУНОВИЌ – ИЗЛОЖБА НА ФОТОГРАФИИ И ПРОМОЦИЈА НА КНИГАТА „МЕТАФОРА“

21.15 ДУО BLACK MOON – МИЛА ТРЕНЕСКА И БИЛЈАНА БУЏАКОСКА

22 ЈУЛИ – СРЕДА

20.30 ИЗЛОЖБА НА ДЕЛА ОД РАБОТИЛНИЦАТА – ЦРТАМЕ НА ЗАЈДИСОНЦЕ

21.00 ПРЕМИЕРА НА ДОКУМЕНТАРНИОТ ФИЛМ : ТРПЕЈЦА НА ДЛАНКА – РЕЖИЈА: КРИСТИЈАН ЉУШЕВ

21.45 МАРТИН МИЛЕСКИ СО ПРИЈАТЕЛИТЕ – МУЗИЧКИ ПЕРФОРМАНС

23 ЈУЛИ – ЧЕТВРТОК:

20.30 ВЕЧЕР СО ЖИВКО ПОПОВСКИ – ЦВЕТИН

 24 ЈУЛИ – ПЕТОК:

20.30 ВЕЧЕРНА ПРОМЕНАДА – СО КАЈЧЕ ПО ЕЗЕРОТО – МЛАДИ ИНСТРУМЕНТАЛИСТИ – РЕПРОДУКТИВЦИ : ХАРМОНИКА, ФЛЕЈТА, ГИТАРА И ВИОЛИНА

Атрактивна програма – музичарите ќе пловат со кајчиња покрај брегот и ќе свират

21.00 ПРЕМИЕРНА ТЕАТАРСКА ПРЕТСТАВА ОД РАБОТИЛНИЦАТА ЗА ТЕАТАР СО МАРИЈА НОВАК

25 ЈУЛИ – САБОТА:

10.00 ФАЌАМЕ РИБА НА ЈАДИЦА – НАТПРЕВАР КРАЈ ЕЗЕРО

20.30 ВЕЧЕР СО ЕМИЛИЈА МАРИНОВА И ЈАНЕ ТОДОРОСКИ ( ЕВЕРГРИН МУЗИКА )

 

26 ЈУЛИ – НЕДЕЛА:

10.00 КАЈАКАРСКА РЕГАТА „НОМЧЕ МИТРЕСКИ“ 2020

20. 30 ЗА ТРПЕЈЦА СО ЉУБОВ – КОЛАЖ ОД ЗАПИСИ СО ТРПЕЈЧАНИ ОД АВТОРОТ: ДАНИЛО КОЦЕВСКИ – ПРЕЗЕНТАЦИЈА : ЈАНА КОЦЕВСКА И МАРИЈА КОНДОВСКА

27 ЈУЛИ- ПОНЕДЕЛНИК:

10.00 ТРАДИЦИОНАЛЕН ИЗЛЕТ ДО ЧОКОЛСКО

20.30 КОНЦЕРТ СО БЕНДОТ „БРОЗ“ ОД ОХРИД

 

28 ЈУЛИ – ВТОРНИК

20.30 СВЕЧЕНО ЗАТВОРАЊЕ

20.45 ИЗЛОЖБА НА ДЕЛА ОД ВТОРАТА МЕЃУНАРОДНА УМЕТНИЧКА КОЛОНИЈА „ТРПЕЈЦА – 2019“

21.00 ВЕЧЕР СО АНСАМБЛОТ „БИЛЈАНА“