Средба на премиерот Спасовски со претседателот на Националниот совет на Австрија, Соботка
Претседателот на Владата на Република Северна Македонија, Оливер Спасовски, се сретна со делегација на Националниот совет на Република Австрија, предводена од претседателот на Советот, Волфганг Соботка.
На средбата е соопштено дека продолжува јасната поддршка од Република Австрија за европерспективите на нашата држава и за отворањето на преговорите со ЕУ.
Изразени се честитки за патот што го изоде Република Северна Македонија во реформскиот процес и во добрососедските односи. Констатирано е дека Договорот од Преспа е пример за решавањето чувствителни билатерални прашања и во целиот регион. Посебно е посочен како важен чекор за напредокот, донесениот Закон за јавно обвинителство.
Премиерот Спасовски се заблагодари за пријателската, искрена и континуирана поддршка што ја добива нашата држава од Република Австрија.
„Денешната средба се случува во важен период, кога очекуваме нашата држава да стане полноправна членка на НАТО, а по донесените важни, храбри и визионерски одлуки, со право очекуваме и одлука за почеток на преговорите со Европската унија. Продолжуваме да даваме позитивни аргументи и остануваме посветени на реформските процеси и на сите аспекти што се очекуваат од Република Северна Македонија, во однос на преговарачкиот процес“, рече премиерот Спасовски.
На средбата се разговараше за можностите за поефикасна економска соработка, како и за можен придонес од пријателите од Австрија во делот на што поквалитетни законски решенија. Оценето е дека економската соработка е на добро ниво и дека има можности за натамошен развој.
Разговарано е и за миграциската состојба, при што е потврдена досегашната успешна соработка помеѓу двете држави. Премиерот Спасовски соопшти дека нашата земја е подготвена, преку заеднички европски политики, како и досега, да има усогласен настап во врска со решенијата по ова прашање.
