Филипче: Уште еден позитивен случај на пациентка со корона вирус, апелирам граѓаните да ги почитуваат препораките за заштита од овој вирус
Министерот за здравство д-р Венко Филипче, на денешната прес-конференција информираше дека доцна синоќа на Клиниката за инфективни болести беше дијагностициран уште еден случај на пациентка позитивна на корона вирусот.
„Таа во текот на претпладнево се хоспитализира на Клиниката за инфективни болести. Нејзината состојба е стабилна со лесна клиничка форма, исто како и состојбата на двајцата сопружници претходно хоспитализирани. Состојбата на прво заболената е практично целосно стабилизирана. Во текот на денешниот ден или утре ќе се направи контролниот тест, после што ќе се одлучи дали ќе биде пуштена од болница. Морам да изразам огромно разочарување, во контекст на непочитувањето на препораките и апелите на задолжителната автоизолација, после секое патување во ризичните региони. Ве информирам дека пациентката е жена, наша колешка-лекар која пред една недела допатувала од Италија. Таа докторка е директорка на Клиниката за кожни болести, и практично после враќањето во земјава во изминатите пет работни дена одела редовно на работа“, потенцираше министерот Филипче.
Министерот Филипче изјави дека со исклучително големо внимание се пристапува кон мерките на Клиниката за кожни болести.
„Во овој момент целата екипа од Институтот за јавно здравје прави проценка на степенот на ризик за сите кои што контактирале со неа, како вработените, така и пациентите. Можно е согласно проценката и одлуката на епидемиолозите денеска одделот да биде целосно затворен. Целокупниот медицински персонал согласно фреквенцијата и должината на контактот кој го имале да бидат испратени на домашна самоизолација. Пациентите кои што се хоспитализирани исто така, со оглед на тоа што станува збор за пациенти кои можат согласно сегашните сознанија, да го продолжат лекувањето и во домашни услови. Сите други прегледи во периодот кој што следи ќе бидат насочени кон другите јавни здравствени установи каде што има вакви специјалисти. Добро е што колешката немала ден во амбуланта па немала директен контакт со пациенти, кои што доаѓале однадвор во изминатава недела. Од епидемиолошката анкета таа досега ги навела и сите други контакти вклучително и членовите на нејзиното семејство, пријатели. За сите нив, согласно разговорите со епидемиолозите, ќе се донесе соодветна одлука за начинот на изолација“, рече министерот Филипче.
Деноноќно сме посветени на контрола на ова прашање со корона вирусот, целиот тим кој што работи во Министерството во смисла на превенција, третман, мерките кои што ги препорачуваме за натамошно ширење на вирусот. Министерот Филипче рече дека ова непочитување на препораките е навистина огромно разочарување.
„Секојдневните апели за самоизолација мора да се сфатат многу сериозно. Не можеме да ги затвориме границите. Ниту една земја во Европа го нема направено тоа. Практично е невозможно и затоа всушност сите препораки на експертите на СЗО се за самоизолација, како што всушност Владата препорача пред две недели. Затоа потенцирам секој кој што доаѓа од ризичен регион доколку на граница нема симптоми, и тоа е тој најризичен стадиум на болеста, во инкубација кога нема симптоми а веќе имало контакт со заболен кој што граѓанинот не може да го знае, мора да остане во автоизолација 14 дена. На тој начин го штитиме сопственото здравје и здравјето на нашите најблиски, на сите граѓани на нашата држава. Мора да имаме одговорност кон колективното здравје заради тоа што тоа е нашиот најголем приоритет. Апелирам и до вас медиумите и во исто време сакам да изразам огромна благодарност за одличната соработка за повторување и пренесување на мерките за заштита и превенција. Вашата поддршка во овој момент е од исклучително голема важност“, истакна министерот Филипче.
Во текот на вчерашниот ден е прогласена црвена зона во 14 провинции на Ломбардија. Во интензивна комуникација сме со министерот за надворешни работи, со нашиот конзул во Северна Италија. Сите тие мерки за изолација важат за сите луѓе коишто се затекнати, без разлика дали се жители или се државјани на други земји, што значи дека на нив им е забрането патувањето.
Од вчера авиокомпанијата Wizz Air ги суспендираше сите летови со ризичните региони во Северна Италија. Во контекст на сето ова, утрово испративме и барање до Стопанска комора за информација од секторот туризам, дали се очекува и дали имало организирани патувања за празникот и доколку имало кои се тие агенции, кога ги очекуваат да се вратат патниците со цел да знаеме претходно пред да се појават на граничните премини.
„Денеска или во текот на утрешниот ден ќе се направи контролниот тест на првата пациентката со корона вирус, па ќе знаеме во кој момент ќе биде пуштена од Инфективната клиника. Утре поминува 14-дневниот карантин на нејзините сопатници. Ќе се направи клинички преглед и интервју со епидемиолозите, врз основа на кои податоци ќе се одлучи дали ќе се направи тестирање или ќе се продолжи мерката за изолација, согласно нивната здравствена состојба. Уште еднаш упатувам смирувачка порака. Целосно сме посветени на решавање на ова прашање, будно ги следиме промените во регионот, во околните земји, и во интензивна комуникација сме со претставници на СЗО и во овој момент нема поголем приоритет во нашиот сектор од прашањето на проблемите кои произлегуваат од корона вирусот. Остануваме редовно, точно, транспарентно да ја информираме јавноста за сите промени и ситуации кои што ни се јавуваат на начин на кој тоа го правевме досега“, потенцираше министерот Филипче.
